အထွေထွေအုပ်ချုပ်ရေးဦးစီးဌာန၊ မြေယာစီမံခန့်ခွဲခြင်းလုပ်ငန်း

မြေယာဌာန၏ လုပ်ငန်းတာဝန်များ

၁။ မြေယာဌာန၏ လုပ်ငန်းတာဝန်များမှာ အောက်ပါအတိုင်းဖြစ်ပါသည် -

(က) ဌာနဆိုင်ရာများအတွက်မြေသိမ်းပေးခြင်း၊ မြေလွှဲပေးခြင်းဆိုင်ရာကိစ္စရပ်များ၊
(ခ) သာသနာရေးနှင့် ဝင်ငွေမရှိသော လူမှုရေးလုပ်ငန်းများအတွက် သာသနာဂရန်၊ အခွန်လွတ်မြေငှားဂရန်ထုတ်ပေးခြင်းဆိုင်ရာကိစ္စရပ်များ၊
(ဂ) ဗဒ္ဓသိမ်ဂရန်ထုတ်ပေးခြင်းဆိုင်ရာကိစ္စရပ်များ၊
(ဃ) နှစ်တို/နှစ်ရှည်မြေငှားဂရန်များထုတ်ပေးခြင်းဆိုင်ရာကိစ္စရပ်များ၊
(င) ရေကန်မြေသတ်မှတ်ခြင်း၊ ပယ်ဖျက်ခြင်းဆိုင်ရာကိစ္စရပ်များ၊
(စ) သုသာန်မြေသတ်မှတ်ခြင်း၊ ပယ်ဖျက်ခြင်းဆိုင်ရာကိစ္စရပ်များ၊
(ဆ) စားကျက်မြေသတ်မှတ်ခြင်း၊ ပယ်ဖျက်ခြင်းဆိုင်ရာကိစ္စရပ်များ၊
(ဇ) ကျေးရွာဘုံမြေသတ်မှတ်ခြင်း၊ ပယ်ဖျက်ခြင်းဆိုင်ရာကိစ္စရပ်များ၊
(ဈ) မြေယာအငြင်းပွားမှုများ ဖြေရှင်းဆောင်ရွက်ခြင်းဆိုင်ရာကိစ္စရပ်များ၊
(ည) နိုင်ငံခြားသားပိုင်မရွှေ့မပြောင်းနိုင်သောမြေကိစ္စများ ဆောင်ရွက်ခြင်းဆိုင်ရာ ကိစ္စရပ်များ၊
(ဋ) အိမ်ခြံမြေအကျိုးဆောင်များ/ရွှေလုပ်ငန်းရှင်များကြီးကြပ်ရေး အာဏာပိုင် လုပ်ငန်းတာဝန်များ။

မြေယာဌာနမှ နိုင်ငံတော်ကိုယ်စား တည်ဆဲမြေယာစီမံခန့်ခွဲရေးဥပဒေများနှင့်အညီ စီမံခန့်ခွဲလျက်ရှိသော မြေအမျိုးအစားများ

၂။ အထွေထွေအုပ်ချုပ်ရေးဦးစီးဌာန၊ မြေယာဌာနမှ နိုင်ငံတော်ကိုယ်စား တည်ဆဲမြေယာစီမံခန့်ခွဲရေးဥပဒေများနှင့်အညီ မြို့မြေ/ရွာမြေ၊ သာသနာမြေ၊ ဗဒ္ဓသိမ်မြေ၊ မြစ်ကမ်း သဲသောင်မြေ၊ ရေကန်မြေ၊ သုသာန်မြေ၊ ကျေးရွာဘုံမြေ/စားကျက်မြေ၊ အစိုးရကစီမံခန့်ခွဲခွင့်ရှိသောမြေများကို စီမံခန့်ခွဲလျက်ရှိပါသည်။

မြေယာစီမံခန့်ခွဲပိုင်ခွင့် အပ်နှင်းထားသောပုဂ္ဂိုလ်များ

၃။ အောက်ပါပုဂ္ဂိုလ်တို့အား မြေယာစီမံခန့်ခွဲပိုင်ခွင့်ကို လုပ်ပိုင်ခွင့်အပ်နှင်းထားပါသည်-

(က) ဘဏ္ဍာတော်မင်းကြီး (Financial Commissioner) ၏ လုပ်ပိုင်ခွင့်များကို ညွှန်ကြားရေးမှူးချုပ်၊ အထွေထွေအုပ်ချုပ်ရေးဦးစီးဌာနအားလည်းကောင်း၊
(ခ) တိုင်းမင်းကြီး(Commissioner)၏ လုပ်ပိုင်ခွင့်များကို ဒုတိယညွှန်ကြားရေးမှူးချုပ်၊ တိုင်းဒေသကြီး/ပြည်နယ်အထွေထွေအုပ်ချုပ်ရေးဦးစီးဌာနအားလည်းကောင်း၊
(ဂ) ကော်လိတ္တော်အရာရှိ/ခရိုင်ဝန်( Collector/ Deputy Commissioner)၏ လုပ်ပိုင်ခွင့်များကို ခရိုင်အုပ်ချုပ်ရေးမှူး၊ ခရိုင်အထွေထွေအုပ်ချုပ်ရေးဦးစီးဌာနအားလည်းကောင်း၊ ကိုယ်ပိုင်အုပ်ချုပ်ခွင့်ရဒေသများဖြစ်သည့် နာဂ၊ ဓနု၊ ပအိုဝ့်၊ ပလောင်နှင့် ကိုးကန့်ဒေသများတွင် ကော်လိတ္တော်အရာရှိ၏ လုပ်ပိုင်ခွင့်များကို ယင်းဒေသအထွေထွေအုပ်ချုပ်ရေးဦးစီးဌာနဦးစီးမှူး (ညွှန်ကြားရေးမှူး)အားလည်းကောင်း၊
(ဃ) လက်ထောက်ကော်လိတ္တော်အရာရှိ၏ လုပ်ပိုင်ခွင့်များကို မြို့နယ်အုပ်ချုပ်ရေးမှူး၊ မြို့နယ်အထွေထွေအုပ်ချုပ်ရေးဦးစီးဌာနအားလည်းကောင်း။

အထွေထွေအုပ်ချုပ်ရေးဦးစီးဌာနအနေဖြင့် မြေယာစီမံခန့်ခွဲရေးလုပ်ငန်းများ ဆောင်ရွက်ရာတွင် ကိုးကား ဆောင်ရွက်လျက်ရှိသောဥပဒေများ

၄။ အထွေထွေအုပ်ချုပ်ရေးဦးစီးဌာနအနေဖြင့် မြေယာစီမံခန့်ခွဲရေးလုပ်ငန်းများ ဆောင်ရွက်ရာတွင် အောက်ပါဥပဒေ၊ နည်းဥပဒေ၊ စည်းမျဉ်းဥပဒေ၊ အမိန့်ဆင့်ဆိုချက်များနှင့်အညီ ဆောင်ရွက်လျက်ရှိပါသည်-

(က) ၁၈၇၆ ခုနှစ်၊ မြေနှင့်အခွန်အက်ဥပဒေ၊ နည်းဥပဒေ၊ အမိန့်ဆင့်ဆိုချက်များ၊
(ခ) ၁၈၈၉ ခုနှစ်၊ အထက်မြန်မာနိုင်ငံမြေနှင့် အခွန်စည်းမျဉ်းဥပဒေ၊ နည်းဥပဒေ၊ အမိန့် ဆင့်ဆိုချက်များ၊
(ဂ) ၁၈၉၄ခုနှစ်၊ မြေသိမ်းအက်ဥပဒေနှင့် နည်းဥပဒေများ၊
(ဃ) ၁၈၉၈ ခုနှစ်၊ အောက်မြန်မာနိုင်ငံ မြို့နှင့်ကျေးရွာမြေများအက်ဥပဒေ၊ နည်းဥပဒေ၊ အမိန့်ဆင့်ဆိုချက်များ၊
(င) ၁၈၉၅ ခုနှစ်၊ အစိုးရမြေယာချထားရေးအက်ဥပဒေ၊
(စ) ၁၉၈၇ခုနှစ်၊ မရွှေ့မပြောင်းနိုင်သော ပစ္စည်းလွှဲပြောင်းခြင်းကို ကန့်သတ်သည့် ဥပဒေ၊ လုပ်ထုံးလုပ်နည်းများ။

အထွေထွေအုပ်ချုပ်ရေးဦးစီးဌာနအနေဖြင့် ဆောင်ရွက်လျက်ရှိသော မြေငှားလိုင်စင် (Licence)၊ မြေငှားခြင်း (Lease)နှင့် အပိုင်ဂရန်(Grant) ထုတ်ပေးခြင်းကိစ္စရပ်များ

၅။ အထွေထွေအုပ်ချုပ်ရေးဦးစီးဌာနအနေဖြင့် စီမံခန့်ခွဲပိုင်ခွင့်ရှိသော မြေအမျိုးအစားများကို နိုင်ငံသားများအားလက်ဝယ်ထားခွင့်ပြုရေး၊ အသုံးချခွင့်ရရှိရေးနှင့်စပ်လျဉ်း၍ တည်ဆဲအထက်မြန်မာနိုင်ငံမြေ နှင့် အခွန်စည်းမျဉ်းဥပဒေ၊ မြေနှင့်အခွန်အက်ဥပဒေ အောက်မြန်မာနိုင်ငံမြို့နှင့် ကျေးရွာမြေများ အက်ဥပဒေ၊ နည်းဥပဒေများ၊အမိန့်ညွှန်ကြားချက်များနှင့်အညီ အောက်ပါလုပ်ငန်းများအား စီမံခန့်ခွဲဆောင်ရွက်ပေးလျက်ရှိပါသည်-

(က) မြေငှားလိုင်စင်(Licence) ထုတ်ပေးခြင်း၊
(ခ) မြေငှားဂရန်(Lease)ထုတ်ပေးခြင်း (နှစ်တိုမြေငှားဂရန်- ၁၀နှစ်၊ နှစ်ရှည်မြေငှားဂရန်- ၃၀နှစ်)

၆။ မြို့မြေစီမံခန့်ခွဲခြင်း၌ နိုင်ငံသားများနေထိုင်ရန်၊ အဆောက်အဦဆောက်လုပ်ရန်၊ စီးပွားရေးနှင့် စက်မှုလက်မှုလုပ်ငန်းများ လုပ်ဆောင်နိုင်ရန် အောက်ပါဝန်ဆောင်မှုများ ပေးအပ်လျက်ရှိပါသည်-

(က) (၁)နှစ်မှ (၃)နှစ် သက်တမ်းရှိ မြေငှားလိုင်စင်(Licence) ထုတ်ပေးခြင်း၊
(ခ) အဆောက်အအုံခိုင်မာမှုမရှိသောမြေများကို (၁၀)နှစ်သက်တမ်းရှိ နှစ်တို မြေငှားဂရန်၊
(ဂ) ခိုင်မာသောအဆောက်အအုံများရှိပါက ဆောက်လုပ်မည် ဆိုပါက (၃၀)နှစ် သက်တမ်းရှိ နှစ်ရှည်မြေငှားဂရန်နှင့်
(ဃ) စီးပွားရေးနှင့်စက်မှုလက်မှုလုပ်ငန်းများအတွက် (၃၀)နှစ်သက်တမ်းရှိ စက်မှု/စီးပွားမြေငှားဂရန်(Lease)ထုတ်ပေးခြင်း။

၇။ နှစ်စဉ်မြေငှားရမ်းခ (Land Revenue) အနေဖြင့် လူနေထိုင်ရန်အတွက် မြေတန်ဖိုးဇုန်နှုန်း သတ်မှတ်ချက်၏ (၆%) သို့မဟုတ် အလားတူ မြေငှားရမ်းခ၏ (၇၅%)ကိုလည်းကောင်း၊ စီးပွားရေးနှင့်စက်မှုလုပ်ငန်းများ မြေနေရာအသုံးပြုရန်အတွက် စက်မှု/စီးပွားမြေငှား ဂရန်ထုတ်ပေးရာတွင် မြေတန်ဖိုးဇုန်နှုန်း သတ်မှတ်ချက်၏ (၆%)အထက်မှ (၁၂%)ထိ လည်းကောင်း သတ်မှတ်ထားပြီး ဆောင်ရွက်ပေးလျက်ရှိပါသည်။

မရွှေ့မပြောင်းနိုင်သောပစ္စည်းများ လွှဲပြောင်းခြင်းဆိုင်ရာကိစ္စရပ်များဆောင်ရွက်မှု

၈။ မရွှေ့မပြောင်းနိုင်သောပစ္စည်းများလွှဲပြောင်းခြင်းကို ကန့်သတ်သည့်ဥပဒေမှာ ယခင်က နိုင်ငံခြားသားများပိုင်ဆိုင်ခဲ့သော မြန်မာနိုင်ငံအတွင်းရှိ မရွှေ့မပြောင်းနိုင်သောပစ္စည်းများနှင့် စပ်လျဉ်း၍ နိုင်ငံခြားသားအဖြစ်တရားဝင်ခံယူထားသော မြန်မာနိုင်ငံသားများ၊ နိုင်ငံခြားနေ နိုင်ငံခြားသားများ၊ အခြားနိုင်ငံ၌ နိုင်ငံသားအဖြစ်ခံယူထားသူများ မြေယာပိုင်ဆိုင်ခွင့်မရှိစေဘဲ မြန်မာနိုင်ငံသားများသာ ပိုင်ဆိုင်ခွင့်ရရှိစေရန်အတွက်လည်းကောင်း၊ ယခင်ပိုင်ဆိုင်ခဲ့သော နိုင်ငံခြားသားများ၏ သားစဉ်မြေးမြစ်များကျန်ရှိပါက အမွေဆက်ခံပိုင်ခွင့် ရရှိစေရန်အတွက် လည်းကောင်း၊ ဥပဒေပုဒ်မ-၆(က) အရ အမွေဆက်ခံခွင့်ပြုခြင်း၊ ဥပဒေပုဒ်မ၆(ခ)အရ ပြည်သူ့ဘဏ္ဍာအဖြစ် သိမ်းဆည်းခြင်းများ ဆောင်ရွက်လျက်ရှိပါသည်။

၉။ မရွှေ့မပြောင်းနိုင်သော ပစ္စည်းလွှဲပြောင်းခြင်းကို ကန့်သတ်သည့် ဥပဒေဆိုင်ရာ စိစစ်ရေးအဖွဲ့ကို မရွှေ့မပြောင်းနိုင်သော ပစ္စည်းလွှဲပြောင်းခြင်းကို ကန့်သတ်သည့်ဥပဒေ ဆိုင်ရာ လုပ်ထုံးလုပ်နည်းများကို ပြင်ဆင်သည့် လုပ်ထုံးလုပ်နည်းအရ အထွေထွေအုပ်ချုပ်ရေး ဦးစီးဌာန (မြေယာဌာန)၊ ညွှန်ကြားရေးမှူးမှ အတွင်းရေးမှူးအဖြစ် တာဝန်ယူဆောင်ရွက်ပေးလျက်ရှိပါသည်။